Stare poslovice i izreke
Zapisav: Anton Starčić Šopeć
- Čovik se vadi dokljer god je živ.
- Čin se više prigiblješ, više ti je rit vidit.
- Bog ne plaća saki dan.
- Bolje sam nego slabo kunpanjan.
- Bog je vraga stvoriv zato da se ljudi š njin pohićivaju.
- Huja je samšćina, nego ubošćina.
- Edan put biži pas, drugi put zajac.
- I slipa kokoš zrno najde.
- Ki more, mu i konj more.
- Ki va jamu leti, se i maha lovi.
- Ki nima srama, nima ni poštenja.
- Ki pride prvi va malin, prvi melje.
- Ki ne vaga, nima blaga.
- Ki nima glavu, mora imet noge.
- Ki od straha umre, mu s prci zvone.
- Ki se edan put opeče, i na mrzlo puše.
- Ki s kon spi, s tin drži.
- Ki vajer pljuva, nazad mu pada.
- Ki tebe s kamikon, ti njega s kruhon.
- Ki za malo gleda, malo vredi.
- Ki ni za se, ni ni za drugiga.
- Ki solo manja, solo krepa.
- Ki ni za jilo, ni ni za dilo.
- Ki movči, stotin odgovara.
- Ki z gospodu črišnje ji, repi mu ostajeju.
- Ki se kuja, mu je rit huja.
- Ki umi, njemu dvi.
- Ki dila greši, ki ne dila da još više.
- Kaj cino kupiš, drago platiš.
- Kaj ni pred piron, ni ni zad piron.
- Kaj noć prespi, noć poji.
- Kaj trezan misli, pijan govori.
- Kada vrag nima ča dilat, materi pepev vrit hita.
- Kadi ni grma, ni ni hlada.
- Koga ni, ta ne ji.
- Komu se je molit, se ni grozit.
- Koga će Bog kaštigat, zame mu pamet.
- Koga kača uji, ta se i kušćerice boji.
- Kakov si doma, si i od domu.
- Ki ni za cara, ni ni za curu.
- Kadi su dva, tretiga ne rabi.
- Kasno je zapovdan k maši poć.
- Krava ni nigdar nogu na ležeć slomila.
- Neće muha nego na mršaviga konja.
- Neće vrag nego na velu gomilu srat.
- Ni se ča z rogatin bost.
- Ni pravi ki pitomo pušća, a divo lovi.
- Niedan se ni navajen rodiv.
- Ne daj se napeljat bedastijimu od sebe.
- Ni siromah ki ma malo, nego oni komu puno triba.
- Ni važno kaj je na glavi, nego va nji.
- Ni se zlo za zlo.
- Ni eno dilo ruk ne blati, nego krast.
- Ni se triba špotat hujimu od sebe.
- Ni saki petak Božić.
- Više vredi prišparano, nego zasluženo.
- Više vredi prišparano jajce, nego pojiden vov.
- Više bab, kilavije dite.
- Strpljenje je Božja mast, brižan oni ki se š nju maže.
- Ko ni majhaniga, neće bit ni veliga.
- Od legla ni nego bovha i šenac.
- Od pasa i mačeta ni nego drek.
- Par para najde.
- Saka nova metla dobro mete.
- Vredi škuža poli dobriga muža.
- Sikira mu je va med pala.
- Majhane škulje maši, a na velu mu teče.
- Ma dobar štumih.
- Zaklela se zemlja raju, da se se otajne znaju.
- Ne daj Boh da ma ča.
- Sit lačnimu ne veruje.
- To ne bi ni pas na maslu pojiv.
- Pusni špasi, Katarinski faši.
- Kaša tanke noge znaša.
- Saki fažov prdac i pov.
- Prišav je vrag po svoje.
- Ne bin si va njega (nju) ni posrane pete obrisav (obrisala).
- Složila se tuga i nevolja, tuga kreće, a nevolja neće.
- Triba dilat koda ćeš za vavik živit, a Boga molit koda ćeš valje umrit.
- Najhuja je kletva "Boh ti daj slabiga susida".
- Za siromaha vavik Boh providi.
- Z peron piše, z drekon zapečati.
- Črljena zora, mokra gora.
- Ako je puno lišnjiki da će bit oštra zima.
- Ne imej sam sebe za tovara.
- Saki je san sebe vridan.
Izreke vezane za kolendar, svece i štajune
- Sveta Marija Kandalora (2. 2.) zima vanka fora.
- Prišav je Sveti Blaž (3. 2.) pa je rekav da je to se vela laž.
- Sveta Agata (5. 2.) snigon bogata.
- Sveti Matija (24. 2.) led razbija, ako ga ne najde, ga načinja.
- Sveti Grgur (12. 3.) na kovcu jajce znese.
- Sveti Josip (19. 3.) pride z bilu bradu.
- Sveta Jelena (22. 5.) gora zelena.
- Ako na Svetiga Medardota (8. 6.) pada daž, padat će neprestano četrdeset dan.
- Sveti Ivan (12. 6.) kose van.
- Sveti Petar (29. 6.) je na sovcu jajce spekav.
- Kako Sveta Uršula (21. 10.) reče, tako lito teče.
- Sveti Luka (18. 11.) perje kljuka.
- Sveta Katarina van, (25. 11.) do Božića misec dan.
- Na Štipanju (26. 12.) je dan tuliko dalji kuliko peteh prik praga skoči.
"Klanjske stare pritožice" ke je Dr. Matko Laginja zapisav va svoji knjižici KASTAV GRAD I OBĆINA, a ka je tiskana va knjižari "Dolenc" 1889. lita va Trstu
- Kuliko je vran bilih, tuliko je maćeh dobrih.
- Dokljer zvona zvone, ljudi žanbore.
- Ne stori dobra, pa nećeš imet zla.
- Nigdar se ne osvećuj, as osveta sama priđe.
- Za nesriću ni triba Boga molit.
- Reci ti njemu, da ne bi on tebi.
- Dobro je govorit, a još je bolje movčat.
- Crkveno je ognjeno.
- Brižan oni na koga padaju plovanove ruke.- Polje ma oči, a gora uši.
- Badava zlatnin peron pišeš, ako z blaton zapečatiš
JOŠ PAR STARIH IZREK
- "Kasno je zapovne k maši poć."
- "To će bit kada bu zapovne kokoš jajce znesla."
- "Ja, ja, to će bit kot kaj ćeju se zapovne žbele rojit."
- "Voda ka proteče, k malinu već ne doteče. Ta voda već ne melje."
Ma jur je tako valja bilo kada se od vika tako reče, ali danas ni više tako. 1967. lita je velečasni Pavić prvi put služiv večernju mašu. Mnogimu je to bilo, ma pogotovu starijin ljuden, sablazan, aš se je do onda sveta maša služila na 6 ur jutro po liti, a po zimi na sedan ur. Se je reklo da se maša služi do devet ur prerd povne i potljer ne.
Zapovne, ali pak večer služile su se večernjice, ali blagoslovi. Va Klani su bile jako svečane i pobožne svibanjske, lipanjske i listopadske pobožnosti, ali ti večernjice. Na blagdane, ali nedilju su se sv. maše služile do povdan. Ma je poli nas stric Jače Beleć rekav, kada san mu spomeniv da san sopav večernju mašu: "No sada će se se prominit".
Tako i je, pak kokoš zapovne znese, žbele se i pred večer roje, a zapovne se gre i na sv. mašu.
Kada već pišen kaj su znali Klanjci reć, bin zapisav i ovo. Kada je va selu biv ki kimu se ni moglo stat na rep, će reć da je biv iz bilo kiga razloga moćan i ohol, ali bahat, su rekli Klanjci ovako: "Ni konja va Klani, za kiga ni crugalj na Jordani." Na Jordani da je od starine bila Babićeva butiga va ki se je moglo se kupit; od kruha do konjske oprave ali orme, pa tako i cruglje. S tin se je mislilo reć, ako te niš ne more va življenju speglat, ma to se je mislilo na oholice, onda pride bolest, ali pak staračka nemoć, kada oholost čoviku more samo škodit, a ne koristit.
Zapisav Josip Gržinčić Tomačin