Va spomen na Robija Diraku

Nakon tri lita za redon kako je va Klani na Vasi ispraćano Staro lito o povdan, ovo lito tuga, muk, tišina. Namisto onih velih kov od kabeli na kih je stala hrana i pijača, jarmonik, bubnji, čuda ljudi i pjesme, sada va tišini gore sviće.

Gore za čovikon ki je biv edan od začetniki ideje od ove lipe fešte, za čovikon kimu se ni grustilo dilat bez plaće za opće dobro, da bi se ljudi zabavili, malo bolje ćutili, bili mrvicu zadovoljniji. Ni mu se grustilo za feštu storit 5 kiv klobasic, skuhat gulaš, čobanac, kaj got triba.

Biv je bezvremenski, dobar z simi, vavik parićan sakomu pomoć; ćeš orat, ćeš pilit, ćeš bekarit, klobasice dilat, se je znav i mogav, onako velik i jak, a onako dobriga srca.

Tuliko se je stopiv z našin miston da opće ne znan kada je ta čovičina prišav iz Veprinca va Klanu; nikako mi zgleda ko da je od vavik biv tu, ko da smo skupa zrasli, ko da se od vavik poznamo bez obzira na razliku va liti.

Bog ga je prerano zev. Imev je samo 44 lita.

Kada to spominjen, ne moren a da se ne domislin još par dobrih ljudi i prijatelji, ki su nas isto tako prerano napustili va zadnjih lito i pov.

Lani je poginiv Marino Gržinčić Roškin , imev je samo 50 lit, a ovo lito Stojan Marinac Poličin iz Lisca i Branimir Raspor Catorov. Bili su generacija i imeli su po 57 lit.

I njih je Bog prerano zev.

Rečeju da su čudesni puti Gospodnji.

Nadan se da za ove dobre ljude Svevišnji ma niki dobar plan.

Počivajte va miru Božjin.

Sandro Princ

Close

Robert Diraka