New Category

Predaje

"Mi je rekla teta Tonka Lapižova kada san je zapićivav od naše starine: „Piši, piši, Josip, aš sada prihaja vrime kada neće imet ki povidat, ma se neće imet ni komu povidat, aš niedan rad ne posluša.“ Nastav san zapisat kaj got san čuv. San zapićivav, ma mi se je povidalo i kaj nis pitav, kajti mi je dano da ipak živin va vrime kada je još živih ljudi va Klani, ki su rojeni i odgojeni kada su bila ognjišća po kišah i kada još ni bilo letrike, radija, televizije ni novin. Va dovgih jesenskih i zimskih večeri se je povidala pučka predaja i mi se vidi da je to zadnje vrime da se to zapiše. Magari nan se nike zgode čine čudne, ma moramo znat da je to ipak bilo ono vrime i onakov način življenja, pak su i pravila bila drugačija. Niki bi rekav; kako to da ja to nisan čuv ni znav, ma odgovorit si mora sam oni ki se to pita. Bit će da te to ni zanimalo, pak nisi ni pitav, ali si li pak imev priliku da to čuješ. No ja nastojin to se zapisat samo da se ne pozabi."

Josip Gržinčić Tomačin