Žetelica

Šla divojka žito žet,
zabila si je srpa zet.

Prišla je na njivu, pa ovako govori:
„Dragi Bože san li badra, ali mi se spi?

Kaj mi je storit? Bez srpa ne moren žito žet.
Ni mi za plakat, ni za svoju pamet klet.

Sist ću i Divici ću se pomolit,
pak će mi morda na dobro prit“.

Dokljer se divojka Divici molila
i va nebesa ruke lomila,
prišav je do nje naočiti mladić.
Na ramenu je nosiv kosu, babicu i batić.

Nazdraviv je divojki Boga i Divicu,
pak je pita kaj ne žanje čenicu bilicu.

Divojka gleda va mladića, pak ovako reče:
„Oj dični junak, vela nevolja mane peče.
Ja bin rada čenicu bilicu žela, 
ma nis sobu srpa zela.

Doma ne moren po srpa poć,
aš dok nazad priden će bit črna noć.
Ne znan neboga kaj ću materi govorit
i kako ću pred ćaću bez žita doma prit“.

Ma momče ovako divojki odgovara:
„Ja ću ti čenicu pokosit da te mat ne grdi i ne kara.
Ti ćeš smanu doma poć, pak ćeš mi žena bit,
a ja ti obećavan da ću te vazda ljubit.

Va mojih dvori ćeš bit gospodarica,
aš moju mater pokriva črna zemljica.
Ćaća mi vazda reče – Ženi se sinak mili –
ma najbolja je žena ku najdeš na njivi.

Pak mi je Bog dav da san te na njivi našav
baš onako kako san si zapensav.
Pak te na njivi pred višnjin Bogon prosin:
hodi za me da oći dobre glase nosin“.

A divojka ovako mladiću besidila:
„Ni divojke ka bi te odbila.
No kakova bin ti ja žena bila – gren žito žet –
a srp san pozabila.

Ti rečeš da ćeš mi žito pokosit,
no kako ću sirota čenicu bez srpa va snope dit?“

Dokljer divojka mladiću govori,
on od driva srpa načini, pak divojki milo govori
da z drivenin srpon snope načini.

„Ti ćeš sada snope načinjat,
ja ću pase dilat i snope povezat.“

Pokošena je na njivi čenica bilica,
va snope vežena ta zlatna krušica.
Va gumna su čenicu podivali,
grahoricu i ljuljku žnje su prebrali.

Divojka se je zula i bosa po strnišću hodila,
zahvalila je Bogu kaj si je dobriga muža zmolila.

Ovu pismicu se ne kanta. Povidala ju je teta Mare Hrančeva- Rusova, ma ni baš znala kako gre ka kitica, pak ju je ispravljala teta Jela Matetinova. 

Si su poslušali, a zapisav je Josip Gržinčić.