Ena zgoda iz hodočašća

Teta Ane Juričina mi je povidala da je ona imela eno sedan lit kada je prvi put šla v Riku na hodočašće na Trsat. Šlo da je puno ljudi iz Klane, a ona je šla z svoju mamu staru i z ćaću starin. Ta put se je va Klani još jako nosilo domaće ruho ali ti narodna nošnja, pa kako je Klanjska nošnja lipa i dosta šara da se je zajno znalo da greju Klanjci.

Kada su prišli pod trsatske skale da je počelo rosit. Kako je ona bila dica, je z drugu dicu po skalah šla brže, a njeja mama stara da je bila krupna ženska, pa da je zaostala z niku Balcmanku kaj je isto teže hodila.  Kako je padav daž, no, rosilo je, su si ženske zdignile na glavu zadnje krilo od sarze, ma odzdola su bile još kotula i kitalj. Ta kitalj (podsuknja) da je biv jako lipo rikaman i da je imev široki lipi merlić, pak to ni bilo srama kaj je sarzu zdignila na glavu. Se to skupa, goranja i dolanja roba bila je dovga do tav. Njeja mama stara je više pazila da si ne zmoči peču na glavi, aš peča je štirkana, nego na halje. Pa kada si je zdignila sarzu na glavu, je skupa potegnila i kitalj i kotulu. 
Ta put ženske nisu nosile dolanje gaće, a pogotovu ne po liti, pak je odzada bila gola. Kada da su prišli na počivalo od prvih skav, već pod vrh, je ona primjetila da se ljudi samo va nju oziraju, ma da je mislila da zagledaju rikam od kitlja, kaj da ga je dva miseca rikamala. Ma nikakov mali da ji je rekav: "Teta, rit van je vidit". 
Lih onda je ona vidila zač su se ljudi za nju ozirali. Zajno da si je doli spustila kotulu i kitalj. Kada su prišli va dvorišće od crikve, su se tamo počekali da greju si skupa va crikav, pak se je njeja mama stara potužila mužu kaj ji se je dogodilo. Ma on da je rekav: "San jast vidiv kaj si storila, ma ti nis niš rekav, aš san misliv da si se tako zavitovala!" Kako Rika onda ni bila jako velika, a po nošnji su znali da je to Klanjica, da su o timu v Riki još dugo povidali.

Zapisav 1971. lita Josip Gržinčić

Puno vrimena da su se v Riki s tin šegačili. Ma ki got Klanjac prišav v Riku da je počev od tiga govorit, ma ni rekav da je to Klanjica, nego Gromišćica, tako da su bili zmišani da potljer nisu znali kaj je to bila za ena ženska.