Šušanj za stelju

Ma do pred par lit se je va štali rabilo za stelju pod blagon samo šušanj. Najraje se je šlo po cerov, ali pak bukov šušanj. Danas se više rabi piljotina. Reče se, da ako je piljotina bukova, da je gnoj dobar, aš ta piljotina brzo sagnjije, ma ako je piljotina smrikova, ali jelova, da ta gnoj je dobar samo tamo kadi je čritena zemlja. 

Črito je po našu staru ilo, ilovača. Ta gnoj ki je storen z jelovu piljotinu da dobro pride va čriteni zemlji, aš da zemlju razrahlja, pak onda ni onako grudasta. 

Valje kako bi palo perje iz gran, se je šlo po šušanj. Ki put ako je bila slana, se je počekalo do ene dobe da slana nestane. Onda bi se z grabljami, ali pak z brizovu metlu šušanj grabilo ali zmelo na kup, pa bi se ga naložilo va lancune od jute, ali pak va napošne koše, i onda bi se na vozu peljalo doma va skadanj. Nike ženske su se to na hrptu z plašćenku doma nosile. 

Najbolje je bilo poć po šušanj dan iza kako je bura puhala. Bura najde misto, kakov zamič i tamo nanese cilo brdo šušnja. No, ki su znali za takove kupe, su tamo šli z štramami. Na vozu se je štrame preplelo z bršću, dosta gusto, i onda se je šušanj nakladav. Se razumi da je na vozu niki morav šušanj peštat kot i sino. Se je to onda dobro povezalo i šušanj se je peljav doma.

Šušnja je puno rabilo, aš je zima dovga, a saki je rad imev da je štala suha, blago čisto, a gomila puna gnoja. Za stelju pod konje je najbolja slama, ma ki ni imev slame, se je šlo va zalu jesen za lipiga dana kosit oštricu, i to se je rabilo pod konje za stelju.

Od šušnja smo se danas pogovarali poli nas.

Govorili su moj ćaća i barba Grže na Novo lito 1967.