Sprovod po nikadanju

Kada umre muški, nakon uru vrimena kako je umrv niki od obitelji gre k plovanu i mežnaru i onda se, ako je rojen va klanjski župi zvoni anguliju z velin zvonon tri puta. Ako umre ženska, onda dva puta. Ako pak umre dite ko ni još bermano, zvoni se edan put. Potrelj se zvoni do ukopa jutro, opovdan i večer. Ako Klanjac živi vani i neće bit zakopan va Klani, angulija se zvoni samo edan put da se zna ki je umrv. Kada umre niki ki va Klani živi, ili klanjski zet ili nevista ki nisu Klanjci, se zvoni na isti način, samo onda zvoni sridnje zvono. 

Va kiši kadi je mrtvac, se zbere rodbina i susidi, mrtviga se opere, probliče, i postavi na odar. Na znožju odrase dine blagoslovljenu vodu va ku se utakne grančica od zelenike s ku se kropi mrtviga i zapali se neparan broj uljanic. Isto tako se pusti da do kraja zgori svića ka se važge dokrelj čovik umira. Va kiši kadi je mrtvac, se badri do ukopa. Nikada se je molilo za mrtve, no danas ritko kadi.

Do 1922. lita se je zakapalo na 9 ur jutro, no sada se sprovod obavi zapovne. Od doma gre sprovod tako da gre križ, uz križ gre laternica, pak gredu dica, pa krune. Onda gre križ kiga nosi ministrant, pa plovan z ministranti ki nose kadivnicu, tamjan i blagoslovljenu vodu. Za njimi greju oni ki nose z mrtvacon, onda rodbina, pa muški, pa onda ženske. Ako se nosi muškiga onda uz banku šest muških nosi sviće, a ako se nosi žensku, sviće uz banku nose ženske. Ako umre mladić, ali pak divojka, na sprovodu jin greju mladenci, zajno ispred plovana. Pred mladenci na par koraki gre ženska obličena va dovgu črninu, a pokrivena z gustin velon. Va rukah nosi velu prelomljenu sviću – znak da je prekinjen mladi život, a gusti vev da je znak da je smrt neprepoznatljiva, pak pride i k onimu ki po liti još ni za umrit. Za žensku va črnini i prelomljenu sviću greju mladenci, obličeni ko da bi šli na vinčanje.

Na starih fotografijah se vidi da na takovin sprovodu, kaj će reć od mladića ili divojke, nose prik ramena bile tkanice mladoženja i oni ki nose mrtvaca. Nevistica na pladnju nosi namisto rožic molitvenik i krunicu, a mladoženja prelomljenu grančicu, po mogućnosti zelenu ili va cviću. Zač se je nike simbole od tih naših navad odhitilo, ni mi poznato.

Sprovod gre od kiše tin redon va crikav kadi se nad odron služi kantana maša za pokojniga, i onda se gre na cimiter. Po navadi se maša za mrtviga služi na osan dan i onda na misec dan, pa saki misec dok ne pasa lito dan, a potrelj sako lito na oblitnicu.

Po stari naši navadi za roditelje se je nosila črnina tri lita, za brata ali sestru eno lito, za sinon ali hćeru deset lit. Žena je za mužen nosila črninu obično do smrti, edino ako se je preudala, onda ni. Odar se je držav 40 dan va kamari, a isto tako su gorile i uljanice i pokrito je zrcalo. Užalo se je tuliko i uru frmat, a i vratnice na kiši su priprte 40 dan. No danas je to malo drugačije. Ženske ne nose facov ni na sprovod, a kamoli dok je korota. Od kada je storena mrtvačnica, sprovod više ne gre od doma, nego od tamo, a drugo se je isto.

Naši stari su nas vadili ovako:

Kamo got staneš , kaj got dregneš i kaj got vidiš, se to su storili naši stari kaj su živili prije nas. Zato su zaslužili da jih mi poštivamo, od njih lipo govorimo i za njih molimo. Ako gremo na sprovod, da budemo pristojno obličeni, da ne govorimo, da o mrtvimu lipo mislimo i za njega molimo. Isto tako kada gremo na cimiter da ne moramo tamo bit pov ure, a kada smo već tamo, onda se ponašajmo onako kako priliči na groblju – dostojno obličeni, tiho i va molitvi.

Rado su naši stari citirali onu našu staru hrvacku mudrost:
- Ki svoje mrtve štuje, sebi dobru budućnost snuje.